Nagising ka na ba isang araw, naghilamos, kumain, naligo, nagtoothbrush, nagbihis at umalis ng bahay na walang kamuwang-muwang na may isang ekstraordinaryong bagay na mangyayari sayo?
Nagdalawang-isip ka na ba kung pupunta ka pa sa sakayan o mag-aabang na lang ng bus sa kanto tapos mapagdedesisyunan mo na lang bigla na pipiliin mo na lang na pumunta sa sakayan para makaupo habang papunta yung bus sa distenasyon mo?
Naranasan mo na ba yung nagbabasa ka lang ng nakakabatong libro tungkol sa hema tapos napatingin ka lang sa tv ng bus dahil herbie yung palabas tapos may makikita kang parang pamilyar?
Naisip mo na ba na yung akala mong pamilyar e hindi lang pala pamilyar dahil kilala mo pala talaga?
Naramdaman mo na ba na sana lumipat ka na lang sa may pinakalikod ng bus nung naisip mo yun kanina para tabi kayo (di ba?! hehehe!)?
Naranasan mo na ba yung kahit gusto mong magbasa ng nakakabatong libro tungkol sa hema e mas pipiliin mo na lang magdaydream at mag-isip kung paano mo kakamustahin ang taong hindi mo alam kung kilala ka?
At kung katapat mo na yung taong gusto mo sanang kamustahin, kausapin, kilalanin para naman malaman nya na buhay ka pala, naranasan mo na ba yung bigla ka na lang titingin sa ibang lugar, bagay, tao at magkukunwaring hindi mo nakita ang taong matagal mo nang gustong titigan?
Naranasan mo na ba yung maglimang-isip kung ikaw na ba ang mangungunang magsalita baka sakaling maalala ka nya o mamukhaan man lang tapos dahil mabait sya e mag-uusap kayo tungkol sa nalalapit na board exam o magtatanungan kung may balak ba kayong pumasok ng med school o kung ano na ang mga plano nyo sa mga buhay-buhay nyo?
Naramdaman mo na ba yung sobrang nahiya ka na lang, napabuntong-hininga habang naglalakad sya palayo sayo (tapos habang papalayo sya sinasaulo mo naman kung ano yung pakiramdam ng muling pagkikita, na ang kulay ng suot nyang fitted shirt e ang paborito mong red, at na mas gusto nya ang mejo fit na pantalon na tinernuhan ng chucks, tapos magtataka ka kung bakit dalawang back pack ang dala nya)?
Tapos naglimang-isip ka na ba kung sasakyan mo rin ba ang jeep na sasakyan nya dahil alam mo naman kung saan sya pupunta at dun din naman dadaan ang jeep papunta sa pupuntahan mo?
Naisip mo na ba na sobra na, OA na kung pati sa jeep e magkakasabay kayo kaya pauunahin mo na lang syang makasakay (tapos pag nakakita ka na ng jeep na pwede mong sakyan, hahanapin mo naman yung taong kanina mo pang tinitignan, tapos maiisip mong hindi mo na siguro sya makikita pero tingin ka pa rin ng tingin sa mga loob ng mga jeep na pumapasada)?
Naranasan mo na ba yung sa sobrang gusto mong makita yung taong gusto mong makita e bigla mo na lang sya makikita na patawid na sa kalye habang hawak-hawak yung cellphone nya (tapos itatanong mo sa sarili mo, sino kayang tinetext nito? girlfriend nya?)?
Naranasan mo na ba yung iniisip mo kung ano siguro yung nangyari kung nagsalita ka at nangamusta (tapos bigla mong sasabihin sa sarili mo na hindi na importante yun dahil nangyari na lahat ng dapat mangyari at tapos na at wala ka ngang ginawa kaya walang nangyari! tapos babalikan mo ang nakakabatong libro na tungkol sa hema na kanina mo pang pinanggigigilan tapusin)?
Naranasan mo na ba yung pagkatapos ng anim na oras mong makita yung taong gusto mong makita e makikita mo ulit yung taong gusto mong makita kahit hindi mo naman iniisip na sana magkita nga kayo?
Naranasan mo na ba yung hindi ka na nagdalawang-isip na tignan sya dahil baka sakali ngang makita ka nya at mamukhaan at dahil mabait nga sya e ngingitian ka nya?
Naramdaman mo na ba yung masaya nung nakita ka nga nya at namukhaan at dahil mabait nga xa e nginitian ka na nya (tapos sasabihin mo sa sarili mo na "uy! meant to be! hahaha!")?
Naranasan mo na ba na kahit nasa bus ka na pauwi e naiisip mo pa rin na nakilala ka nya at nginitian ka nya (tapos maiisip mo kung ano ba? mabait lang ba talaga sya o nakilala nya ba talaga ako? tapos sasabihin mo sa sarili mo na sana nakilala ka nga nya pero kung hindi ka naman nya nakilala sana isipin nya kung sino ka?)?
Naranasan mo na ba yung nagsulat ka sa blog mo ng mahabang post na punung-puno ng tanong para lang ikwento ang masaya at weird mong araw?
Naranasan mo na ba yung nagsulat ka sa blog mo para sabihin lang na "AKO OO."?
.
.
.
AKO? OO!
.
.
.
.
pagkatapos ng dalawang buwan, nakita ko ulit si Mr.Noname.
